December 4, 2020

Narrthunai Online News

Tamil News Portal

அதிமுக – பாஜக கூட்டணி உடைகிறதா??

கன்னியாகுமரி மக்களவை இடைத்தேர்தலில் அதிமுக தனித்து போட்டியிட வேண்டும் என அக்கட்சியைச் சேர்ந்த நட்சத்திர பேச்சாளர் நாஞ்சில் பி.சி.அன்பழகன் கூறியுள்ளார்.

அதிமுக – பாஜக கூட்டணி சட்டமன்றத் தேர்தல் வரை தொடருமா என்று பேசப்பட்டு வரும் நிலையில் கன்னியாகுமரி இடைத் தேர்தலிலேயே அதற்கான பதில் கிடைக்கும் என்கின்றனர்.

ஹெச்.வசந்தகுமார் மறைந்ததைத் தொடர்ந்து கன்னியாகுமரி மக்களவைத் தொகுதி காலியாகவுள்ளதாக மக்களவை செயலகம் அறிவித்துள்ளது. தமிழ்நாடு தேர்தல் ஆணையரும் இந்தியத் தேர்தல் ஆணையருக்கு தெரியபடுத்தியிருப்பினும் நவம்பரில் கன்னியாகுமரியில் இடைத்தேர்தல் நடத்த வாய்ப்பில்லை என்று கூறப்படுகிறது.

தமிழ்நாடு சட்டமன்ற பொதுத்தேர்தலின் போதோ, அல்லது அதற்கு முன்பாகவோ தேர்தல் நடத்தப்படவுள்ளதாக கூறப்படுகிறது. இந்நிலையில் கன்னியாகுமரி மக்களவை இடைத் தேர்தலில் எந்தெந்த கட்சிகள் போட்டியிடுகின்றன, யார் யார் வேட்பாளர்களாக களமிறக்கப்படவுள்ளனர் என்பது குறித்த தகவல்கள் வெளிவந்த வண்ணம் உள்ளன.

திமுக கூட்டணியில் காங்கிரஸ் மீண்டும் போட்டியிடுவது உறுதியாகியுள்ள நிலையில் வேட்பாளராக வசந்தகுமாரின் மகன் விஜய் வசந்த் இறக்கப்பட அதிக வாய்ப்புகள் உள்ளன.

அதிமுக கூட்டணியில் கடந்த முறை பாஜக சார்பில் பொன்.ராதாகிருஷ்ணன் போட்டியிட்டார். தமிழ்நாட்டிலேயே பாஜகவுக்கு நம்பிக்கையளிக்கும் விதமாக உள்ள தொகுதி கன்னியாகுமரி. இந்நிலையில் இடைத்தேர்தலிலும் பாஜக களமிறங்க திட்டமிட்டுள்ளது. பொன்.ராதாகிருஷ்ணனோடு சேர்த்து கரு.நாகராஜன், நயினார் நாகேந்திரன், விக்டோரியா கௌரி ஆகியோர் பெயர்களும் அடிபடுகின்றன.

இந்நிலையில் அதிமுக தனித்துப் போட்டியிட வேண்டும் என்ற குரல் அதிமுகவுக்குள் இருந்து கேட்கத் தொடங்கியுள்ளது. அதிமுக நட்சத்திர பேச்சாளர் நாஞ்சில் பி.சி.அன்பழகன் தென்காசியில் இது குறித்துப் பேசியுள்ளார்

நாங்குநேரி சட்டமன்ற இடைத்தேர்தலிலேயே நான் போட்டியிட வாய்ப்பு கேட்டேன். அப்போது மண்ணின் மைந்தருக்கு வாய்ப்பளிக்க வேண்டும் என வலியுறுத்தப்பட்டது. அதே போல் கன்னியாகுமரி மக்களவை தொகுதி இடைத்தேர்தலில் போட்டியிட மண்ணின் மைந்தருக்கு வாய்ப்பளிக்க வேண்டும். குமரி தொகுதியை சார்ந்தவன் என்ற முறையில் நானும் போட்டியிட வாய்ப்பு கேட்பேன். 2021 சட்டமன்ற தேர்தலிலும் அதிமுக மீண்டும் வெற்றிபெறும்”என்று கூறியிருக்கிறார் அன்பழகன்.

ஏற்கெனவே சட்டமன்ற பொதுத்தேர்தலில் பாஜக தனித்து களம் காண வேண்டும் என்று பேசப்பட்டு வரும் நிலையில் அதிமுகவுக்குள் அத்தகைய குரல் கேட்கத் தொடங்கியுள்ளது கவனம் பெறுகிறது.