December 4, 2020

Narrthunai Online News

Tamil News Portal

புதிய வேலை- கவனத்தில் கொள்ள வேண்டிய விஷயங்கள்!!

நீங்கள் கல்லூரி முடித்து முதல் வேலையில் சேரும் நபராக இருந்தாலும் சரி, ஒரு நிறுவனத்தில் இருந்து பணியில் இருந்து விலகி, வேறு புதிய நிறுவனத்தில் சேரும் நபராக இருந்தாலும் சரி. புதியதாக ஒரு வேலையில்  வேலையில் சேரும் முன் நீங்கள் கவனத்தில் கொள்ள வேண்டிய விஷயங்கள்!

முதன்முதலாக வேலைக்குச் செல்லும் போது எல்லோருக்கும் பயமாக தான் இருக்கும்.ஆனால் கல்லூரியில் படிக்கும் போது எதாவது நிறுவனத்திற்கு சென்று பயிற்சி எடுத்திருந்தால் அங்கே என்ன நடக்கும் என்பது ஓரளவிற்கு தெரியும். ஆனால் நிறைய பேருக்கு அங்கே என்ன நடக்கும் ,நாம் எப்படி நடந்து கொள்ள வேண்டும் என்பது பற்றி தெரியாது.ஒவ்வொரு தொழிற்கூடமும் வித்தியாசமான முறையில் இயங்கும். எனவே அதற்குரிய திறமைகளை நாம் வளர்த்துக் கொள்ள வேண்டும்.ஆனால் சில அடிப்படையான விஷயங்கள் எல்லா வேலைகளுக்கும் பொருந்தும்.அதைப்பற்றி தெரிந்து கொண்டால் புதிய வேலையில் சந்திக்கப் போகும் சவால்களை எளிதாக அணுகலாம்.

அலுவலகம் பற்றி தெரிந்து கொள்ளுங்கள்”

நாம் பணியில் சேரப் போகும் முன் நிறுவனம் பற்றி முதலிலேயே தெரிந்து வைத்திருத்தல் அவசியம்.நிறுவனத்தின் குறிக்கோள் மற்றும் நோக்கத்தை புரிந்து கொண்டால் அவர்களது இலக்கு பற்றிய புரிதல் ஏற்படும்.உங்கள் சந்தேகங்களை குழுவினரிடம் கேட்க வெட்கப்படாதீர்கள்.அந்த சந்தேகங்களில் தெளிவு ஏற்பட்டு விட்டால் முன்னை விட வேகமாக ,நன்றாக பணியாற்ற முடியும்.நீங்கள் நிறுவனத்தில் சேருவதற்கு முன் அந்த நிறுவனத்தைப் பற்றி புரிந்து கொள்வதால் எதாவது தடைகள் ஏற்பட்டாலும் அதை எதிர்கொள்ள தயாராவீர்கள்.

“கவனிப்பதில் கவனம் செலுத்துங்கள்”

புதிதாக வேலைக்கு சேருபவர்களின் முக்கியமான கடமைகளுள் ஒன்று அந்த நிறுவனத்தில் பின்பற்றப்படும் கலாச்சாரம் முதல் அவர்களின் குழுவினர் எவ்வாறு வேலை செய்கிறார்கள் என்பதைப் பார்த்து உள்வாங்கிக்கொள்வது தான். நீங்கள் பொறுப்புகளை ஏற்றுக்கொள்ளுமுன் அந்த செயல்திட்டம் பற்றியும், அதில் எதிர்கொள்ளப் போகும் சவால்களைப் பற்றியும்,அதிலுள்ள துறைகள் பற்றியும் நன்றாக தெரிந்து கொள்ளுங்கள். ஆரம்பத்தில் என்ன நடக்கிறது என்று புரியவில்லை என்றாலும் கூட்டங்களில்,அலுவல் சாராத நிகழ்ச்சிகளில் என்று குழுவினரோடு பங்கெடுத்துக் கொள்ளும் போது வேலைப் பற்றியும் குழுவினர் பற்றியும் புரிய ஆரம்பிக்கும்.

மேலதிகாரியிடம் நீங்கள் செய்வதை தெரியப்படுத்துங்கள்”

உங்களுக்கு கொடுக்கப்பட்ட வேலை சிறியதோ பெரியதோ எதுவாயினும் அதன்மூலம் என்ன கற்றுக்கொண்டீர்கள் என்பதையும் அதில் அவ்வப்போது நீங்கள் அடையும் முன்னேற்றத்தையும் உங்கள் மேலதிகாரியிடம் தெரியப்படுத்துங்கள்.நீங்கள் செய்து கொண்டிருக்கும் வேலைப் பற்றி அவரிடம் கருத்து கேளுங்கள்.அவர் கூறும் விமர்சனங்கள் மற்றும் பரிந்துரைகளை கவனத்துடன் கேட்டு திருத்திக்கொள்ளுங்கள்.எதாவது சந்தேகம் கேட்க வேண்டும் அல்லது எதாவது பிரச்சினை என்றால் வேறு யாரிடமும் இதைப்பற்றி ஆலோசிக்காமல் அவரை நேரடியாக பார்த்து பேசுங்கள்.

இதனால் தேவையற்ற பிரச்சினைகளை தவிர்க்கலாம்.நீங்கள் இவ்வாறு நடந்து கொள்ள ஆரம்பிக்கும் போது உங்கள் மேல் அவருக்கு நம்பிக்கை உருவாகும்.

“முக்கியமான செயல் திட்டங்களில் பங்கெடுத்துக்கொள்ளுங்கள்”

ஒரு நிறுவனத்தில் பலரும் சிறு சிறு குழுக்களாக பிரிந்து அவர்களுக்கு ஒதுக்கப்பட்டிருக்கும் செயல்திட்டங்களுக்கு தனது பங்களிப்பை செலுத்துவர்.அதில் சில செயல்திட்டங்கள் நிறுவனத்தினருக்கு மிகவும் முக்கியமானதாக இருக்கும். இங்கே நாம் அந்த செயல்திட்டத்தில் பணியாற்றவில்லை என்றாலும் அதைப்பற்றி தெரிந்து கொள்ள ஆரம்பியுங்கள். ஏனெனில் நிறுவனத்திற்கு முக்கியமென்றால் நமக்கும் அது முக்கியமானது தான்.எனவே அதில் ஏற்படும் சவால்கள் மற்றும் முன்னேற்றங்கள் பற்றி காபி இடைவெளிகளில்(coffee breaks) அந்த குழுவை சார்ந்தவர்களிடம் உங்கள் ஆர்வத்தை வெளிப்படுத்துங்கள்.பிறகு அதைப்பற்றிய உரையாடலை தொடங்குங்கள்.இது முதலில் சங்கடமாகத் தான் இருக்கும். ஆனால் ‘அது என் வேலை அல்ல’ என்று ஒதுக்காமல் மற்ற செயல்திட்டங்களைப் பற்றி ஆர்வத்துடன் தெரிந்து கொள்ளும் குணம் உங்களை தனித்துக் காட்டும்.

புதியனவற்றை விருப்பத்துடன் கற்றுக்கொள்ளுங்கள்”

பொதுவாகவே எல்லா நிறுவனங்களும் மற்றும் அந்த நிறுவனங்களை சார்ந்த குழுக்களும் அவர்களுக்கே உரிய முறையில் வேலை செய்வார்கள். எனவே நாம் ஒரு நிறுவனத்திற்கோ குழுவிற்கோ புதிதாக வேலைக்குச் செல்லும் போது அவர்கள் வேலையை எந்த வழியை தேர்ந்தெடுத்து செய்கிறார்கள், வேலையில் ஏற்படும் சவால்களை எப்படி அணுகிறார்கள்,அதை எல்லாம் சமாளித்து எப்படி குறிப்பிட்ட தேதியில் முடிக்கிறார்கள் என்று ஆர்வத்துடன் கற்றுக்கொள்ள வேண்டும். ஏனெனில் பழக்கப்பட்டப் பாதையில் பயணிக்கும் போது சலிப்பு ஏற்பட்டு உற்சாகம் குறைய தான் ஆரம்பிக்கும். எனவே சூழ்நிலை மாற்றங்களை கண்டு அஞ்சாமல் உற்சாகத்துடன் புதிய பாதையில் பயணியுங்கள். ஒவ்வொரு மனிதரின் வேலை சார்ந்த யோசனைகளை திறந்த மனதுடன் ஆராயுங்கள், பாராட்டுங்கள், உங்களின் ஆக்கப்பூர்வமான சிந்தனைகளை வெளிப்படுத்துங்கள்.ஒவ்வொருவரின் மூளையும் எவ்வளவு அழகாக செயல்படுகிறது என்று நினைக்க தோன்றும். இதன்மூலம் நாம் நம்மை மேம்படுத்திக்கொள்ளவும் செய்வோம்.

நாம் நமக்கான தொழிற் பாதையை உருவாக்கி கொள்ள அனுபவங்கள் மிகவும் அவசியமானவை.அவையே விலை மதிப்பற்ற சொத்து மற்றும் முதலீடும் கூட.அதற்காக குறுக்கு வழிகளில் செல்லாமல் நமது புத்திசாலிதனத்தைப் பயன்படுத்தி கடினமாக உழைக்க வேண்டும். அப்போது நமக்கு கிடைக்கும் அனுபவங்களை வைத்து நமது திறனை வளர்த்துக் கொள்ள வேண்டும். நாம் வேலையை கற்றுக்கொண்டு சிறப்பாக செயல்படுவதோடு நல்ல தொடர்புகளையும் ஏற்படுத்திக் கொள்ளுதல் வேண்டும். மற்றும் வேலை நுணுக்கங்களையும் கற்றுக்கொண்டால் நாம் செய்யும் வேலையில் நிச்சயமாக உயரத்தை தொடலாம்.