January 21, 2021

Narrthunai Online News

Tamil News Portal

சசிகலா விடுதலையில் சிக்கல்: தாமதமாகும் விடுதலை அறிவிப்பு!!

தமிழக சட்டமன்றத் தேர்தலுக்கு இன்னும் சில மாதங்களே உள்ள நிலையில் சசிகலாவின் தண்டனைக் காலமும் நிறைவடையவுள்ளது. சசிகலா விரைவில் வெளியாகி விடுவார் என கடந்த சில மாதங்களாக அவரது ஆதரவாளர்கள் கூறிவந்த போதும், அபராதத் தொகையான 10 கோடி ரூபாய் செலுத்தப்பட்ட போதும் விடுதலை குறித்த அறிவிப்பு தாமதமாகி வருகிறது.

2017ஆம் ஆண்டு பிப்ரவரி 15ஆம் தேதி சிறை சென்ற சசிகலாவுக்கு வரும் பிப்ரவரி 15ஆம் தேதி வரை தண்டனைக் காலம் உள்ளது. ஆனால் நன்னடத்தை விதிகளின்படி முன்கூட்டியே விடுதலை செய்ய வேண்டும் என சசிகலா தரப்பு வழக்கறிஞர்கள் காய் நகர்த்தினர். இந்நிலையில் ஊழல் வழக்கில் தண்டனை பெற்றவர்களுக்கு நன்னடத்தை விதிகள் பொருந்தாது என கூறப்பட்டது. ஆனால் கர்நாடக சிறைத்துறை அவ்வாறு விடுதலை செய்ததற்கான முன்னுதாரணங்கள் இருப்பதாகவும் தகவல்கள் வெளிவந்தன.

விடுதலை தொடர்பாக சசிகலா சார்பாக டெல்லி மேலிடத்தில் பேச்சுவார்த்தை நடத்தப்பட்டதாகவும் கூறப்பட்டது. ஜெயலலிதா இருந்தவரை சுமார் முப்பது ஆண்டுகளாக சசிகலா குடும்பத்தினர் தமிழக அரசியல் களத்தில் முக்கிய சக்திகளாக வலம் வந்தனர். ஜெயலலிதாவின் மறைவும், சசிகலாவின் சிறைவாசமும் மன்னார்குடி குடும்பத்தாரை தமிழக அரசியல் களத்திலிருந்து சற்று தள்ளிவைத்தன. ஆனால் டிடிவி தினகரனோ தமக்கு மக்கள் ஆதரவு இருக்கிறது என்பதை சட்டமன்றத் தேர்தலில் காட்டத் தவறினாலும் உள்ளாட்சி மன்றத் தேர்தலில் காட்டினார்.

ஆயுள் தண்டனை விதிக்கப்பட்ட பெண் 9 ஆண்டுகள் சிறையில் கழித்த நிலையில் அவர் 60 வயதை அடைந்திருந்தால் அவருக்கு தண்டனையில் சலுகை வழங்கும் நடைமுறை தற்போது அமலில் உள்ளதாக தெரிவிக்கப்பட்டுள்ளது. இதனால் சசிகலாவுக்கு விடுதலையில் சலுகை கிடையாது என சிறைத் துறை மறைமுகமாக தெரிவித்துள்ளதாக கூறுகின்றனர்.

சசிகலா ஏற்கெனவே சொத்துகுவிப்பில் 35 நாள்கள் சிறை தண்டனை அனுபவித்துள்ளார். அந்த நாள்கள் இந்த தண்டனைக் காலத்திலிருந்து கழியும், அதோடு சசிகலா கணவர் நடராஜன் உடல்நிலை சரியில்லாமல் இருந்த போதும், அவரது மறைவின் போதும் இருமுறை பரோலில் வெளியே வந்தார். 17 நாள்கள் அப்போது சென்னையில் தங்கியிருந்தார். இந்த நாள்களை சேர்த்தால் சிறைத்துறை ஏற்கெனவே கூறியபடி சசிகலா விடுதலையாகும் தேதி ஜனவரி 27தான் என அடித்துக்கூறுகின்றனர் கர்நாடக சிறைத்துறை வட்டாரத்தில்.

ஜெயலலிதாவின் நினைவு தினத்தை முன்னிட்டு அவரது புகைப்படத்துக்கு சிறையில் உள்ள சசிகலா, இளவரசி ஆகியோர் மலர் தூவி அஞ்சலி செலுத்தியதாக அங்கிருந்து வரும் தகவல்கள் தெரிவிக்கின்றன. அப்போது சசிகலா 10 நிமிடம் கண் கலங்கி அழுததாகவும் கூறப்படுகிறது. இந்த நிகழ்வில் சசிகலா, இளவரசியோடு மற்ற சிறைக் கைதிகளும் கலந்துகொண்டதாக சிறைத் துறை வட்டாரங்கள் தெரிவிக்கின்றன.